Opus 522/ 2000
Mia samma alle Griaskneel
und hoitnd nixen aus,
mia sitznd fast owei
hintam Ofa, drinn im Haus.
Im Renga kannt ma zwoika!
Oda s kannt uns leicht dafrean!
D Sunn kannt uns goa aafbrenna,
kannst d Leit laut jamman hean.
Mia sitzma gean beim Dokta,
irgendebbs wead uns scho faihn,
zu wos wadma denn vosichad?
Ea soit uns ebbs voschreim!
Mei, jeda hod sein Begga,
oda kennst oan, dea koan hod?
Da oane hod an groußn,
da anda an kloan grod.
Mia sand ned gmocht aus Eisn,
am End no goa vozinkt,
mia woin aa nix beweisn,
aa wenn enk des recht schtinkt.
Do samma liaba Griaskneel
vo mia aus aa no Kletzn,
mia sand hoid eha schwach,
enkan Eahgeiz kinnts enk retzn.
Lossts uns in Ruah, uns passts!
Seids ees so, wias enk gfoit!
Mia hammas hoid gean
gmüatle
und woam liaba ois koit.