Opus 500/ 1999
Damit se ebbs riaht,
hom s a Schirennads gmocht,
mittm am Zwiesla Schdoodplotz, mei
da homd d Leit glocht!
Mit riesige Lastwaang
homs an Schnee zuaragfohn,
und hamdn aaf d Schtraß gschitt
fia d „Nacht-City-Bahn“.
Wia s Rennads voabei war,
hod se um den Schnee neamds mehr gsschead.
„Aejtz deaf man mia aa no zammgnoutschn!“
hod ma d Leit schimpfa ghead.
Und dann - nach acht Tog -
is a Gletscha draus woan,
doch wos hod so a Gletscha
aaf unsam Schdoodplotz voloan?
A Gletscha voam Rathaus,
a neia „Event!“
d Leit sand umanandgrutscht
und hom se hoibad darennt.
Wos weands no ois oschtaejn?
Wos weands no ois doa?
Heit loch ma no drübe,
doch moang is scho woah:
Fia Eischtog und Schlittn
a eisige Schtreck?
Vom Leichenhaus om
oi zum schoafn Eck!
Ament bauns no an Schilift
mittn eine in d Schdood?
A Attraktion
die sonst neamad no hod.
Oda se baun a Schprungschanzn
zum Nepomuk oi?
Und da Auslaaf kimmt eine
in Pfeffasoi.