Opus 475/ 1996
Alleine unsere
Erinnerungen besitzen wir wirklich. Auch aus dem Grund soll man sein Leben so
leben, dass man gerne zurückdenkt, ohne sich schämen zu müssen. Alleine dafür
lohnt es sich gut und mutig zu sein.
Woaßt das no? Gestan,
hod d Sunn so woam gscheint,
do hods in am Tog
an Schnee weggagleint.
Woaßt das no? Gestan
- ja, do war ma no jinga,
da hamma zwoa Freind ghod
an jedm Finga.
Woaßt das no? Gestan
da hamma s Haus baut,
alloa mit de Händ,
hod uns neamad zuatraut.
Woaßt das no? Gestan
wia d Kinda warn kloa,
mia warn owei bei eah,
hamm s nia loßn alloa.
Woaßt das no? Gestan
- mei, war ma mia oam!
Doch nirgends wars scheena,
ois bei uns dahoam.
Woaßt das no? Gestan
da hamma no traamd,
mit Freiheit und Gleichheit
hama uns aafgwaamd.
Woaßt das no? Gestan
da hama uns traut,
hamma mitdemonstriad
und riskiad unsa Haut.
Woaßt das no? Gestan
da war d Waejd so weit,
owei enga is woan
mit da Zeit.