Opus 437/ 1994
Eahle und gscheid
aaf oamoi geht ned.
Entweda bist gscheid,
oda eahle und bled.
Mechadst gean globt wean,
dann deafadst zeascht schteam,
und heiratn messatst,
wennst mechadst gschimpft wean...
A Pfarra braucht Schof
a Pfarra braucht Esln,
die ois nacheratschn
und eahm nachehesln.
D Feiawehr braucht a Feia
mindestns hi und do,
damit neamad frogt:
„Zuwos hattsn ees do?“
Wea in a Wessnnest schticht,
den weand d Wessn danahn,
i rat eahm zum Renna,
so schnaej wia a kann.
Wea an Lesabriaf schreibt,
dea muaß rechnen mit ois,
wenna d Woahrad schreibt goa,
hoda boid alle am Hois.
Wea in da Odlgruam riaht
is scho manchmoi ertrunga,
in jem Foi wiada
braun fleckig und gschtunga.
Wea in am Misthaffa krait
und dabei no laut schreit,
mit dem hamm s ned vaej Freid
die sauwan Leit.