Warume in koana Partei bin

Opus 434/ 1994

Parteien? Die Totengräber der Demokatie.

Warume in koana Partei bin?

- des daad de scho lang intressian.

Ja mei, i mog hoid saejba denga,

zu wos häde sunst mei Hian?

s Parteibuach waar fia mi a Kettn,

a Schdoa, dea ma hängad am Hois.

I kann einfach nix nachebetn,

do howe einfach zfaej Schtoiz.

Und i mog a ned luing und ned tricksn,

ned frömmeln, ned soifan, ned schweing,

grod waa s d Fraktion a so hom mecht,

mi voa Möadan und Gauna voneing.

I faejh me ned woih zwischn Gschaftla,

i votrag koan fanatischn Schmaaz,

koa Freindalwirtschaft, koa Lobbykratie,

des is ois wia a biggada Baaz.