I sitz aaf meina Woikn

Opus 369/ 1989

(frei nach "Get off of my cloud" von den Stones)

I sitz aaf meine Woikn

und trink grod mein Kaffee,

da schteigt a Disnjaga

neba mia in d Heh.

I kann me grod no dugga,

mia zreißts fast meine Oahn,

wos hom denn diese Affn,

bei mia herom voloan?

I sitz aaf meina Woikn,

mecht nirgandst andas sei,

da kimmt da Bundeskanzla

aaf an Schprung vorbei.

Ea blewad üwa Politik

und mecht ma ebbs erkläan,

ea ruckt ma owei natta,

i mog eahm ned zuahean.

I sitz aaf meina Woikn

und jodlt ma oan.

I bin rundum zfriedn

hob aaf neamnd an Zoan.

I sing ma an Blues

und s Heaz wiad ma weit,

da treibt me d Uah in d Oabad

und schtaejht ma mei Zeit.

I sitz aaf meina Woikn

und traam vo dia.

Solange vo dia traam

enttaischt me nia.

I traam die scheenstn Sachan

und mecht de gschpian,

doch is mei Woikn zkloa,

da daadst grod ian.

I schrei: Heh! (Heh!)

Du! (Du!)

Die Woikn ghead mei!

Heh! (Heh!)

Du! (Du!)

Wo hast an de dei?

Ja, hod ma denn heit

goa nirgends sei Ruah?

Geh grod zua!