Hintam Zaun

Opus 224/ 1982

 

Noch die Bilder vom Kampf um die Startbahn-West und Gorleben im Kopf, kam die Botschaft vom geplanten Bau einer Atomfabrik in Bayern. Ich wußte, dass jene Bilder nun vor der Haustür Wirklichkeit werden und ich hatte Angst davor, weil ich dabei sein mußte. Vielleicht würde ich sogar meinem Bruder, der Polizist ist, gegenüber stehen. So schrieb ich das folgende Lied dazu aus der Sicht eines Polizisten.

 

Obwoi da Wind aus Südn kimmt

is a greisle koit,

und nirgends sehgst a Bleame wogsn,

und Schnee liegt no im Woid.

Und d Viecha hoitn se so schdaad,

koa Vogl traut se fliang.

Doch dene Leit is Kaejtn wuascht

waa se meassnd heit demonstrian.

 

Aaf da Wiesn hintam Schtachldroht

weidn heit koa Kiah.

Man mecht seine Aung ned trau,

s is wirkle koa Zia.

Do schtehngand ausgwochsne Manna,

beladn beide Händ,

mit Knippe, Gas und Wossaweafa

bewaffnet bis an Zähnt.

 

Und i schdeh in da erstn Reih,

waa i bin Polizist.

Und soit die Bauschtaej bewacha

vo dera Atomfabrik,

und hob Befehl im Foi,

dass schtürmand unsan Zaun,

mit meim Gummiwuuzal

dazwischn zum haun.

 

Da eisig Wind blost ma in s Gsicht,

drum schliaße mei Visier.

Sitzad a liaba voam Fernseha

und tringad ruhig mei Bier.

Wos weand des grod fia Leit duat sei,

die bei dea Kaejtn demonstrian?

Zweng dera Scheiß Atomfabrik

uns alle so schikanian.

 

Aejtz schreins a no! Ja, wos schreins denn grod?

Irgendebbs vom Atomschdaad,

und dass um unsre Kinda geht,

und se gem uns guade Rat,

ned weida fia ebbs zum kämpfa,

wos letztlich alle schod,

und ob mas no ned gspannt hättnd,

mia sitz ma oizamm in oam Boot...

 

Mensch so vaej Leit! Ja, sehge recht!

Do trogt oana a Kreiz!

A andra zaaht a route Fahn,

Mensch Meier, i glaub aejtz schneibts aa no,

des sand ja hundattausnd glatt -

- und i bin ganz alloa -

i klammad me ans Gummiwuuzal

und kimma via wia a Noa.