Opus 222/1982
Meine
Abneigung gegen Werbung sitzt tief, wenig unsittlicheres fällt mir ein.
Hochverehrte Herrschaften!
I deaf sie heit begrißn!
In unsam Lon do kriang sie ois,
ois liegt eahna zu Füssen!
Bei uns is no da Kunde Kine,
hauptsach sie hom Gaejd!
Fia Zasta moch ma oissen megle,
wos gibt aaf dera Waejd!
Woins Schtachlbeern ohne Schtachln?
Brennessln ohne Brenn?
Untatanen ohne Hian
und Tiga ohne Zähn?
Autos ohne Schteiaraal,
dafia mit Sirene?
A Luftmatratzn ohne Luft,
an Sessl ohne Lehne?
An Fernseha mit Nachrichtn
zum saejba ausdenga?
Oda a Baggal Handgranatn,
eipackt zum Voschenga?
A Zeitung ohne Buachschtam?
A Kindawindl ohne Kind?
Schtegglschuah mit Propella,
oda a Flaschal Wind?
Schtehngands am End aaf Waschmaschinen
mit Zahnputzautomatik?
Oda liebens frische Bleame
garantiat aus Plastik?
Hochverehrte Herrschaften,
sie sogn, dass koan Bedarf hom?
Da Bedarf wiad scho no kemma,
wenns no a bissal Zeit hom...
Sitzns eahna nieda und tringands no a Bia,
rauchands a Zigrettn und genießn s unsa Kür!
Mechtns gean an rundn Wiafe
oda lebendige Fasanenbrust?
Mia fiahn a frische Sklavn
songs, aaf wos hom s Lust?
Elektrokawe ohne Schtegga
dafia mit bunte Schtreifn?
A Schwimmreifn mit Außnborda
a Fahrraal mit drei Reifn?
A Loitan ohne Schprossn?
Kaugummis zum Tapezian?
Und unsre feichtn Semmebresl
meaßns unbedingt probian!
Goidbarrn aus Schokolad?
A Pressluftbohra fia ihrn Hund?
Unsa Lebakas in Schpraydosn
is praktisch und so narrisch gsund!
Tannenbaam in Konservn,
haltbar bis zum negstn Mai,
Politika und Filmschauspiela
hamma zur Zeit wieda nei...!
Hochverehrte Herrschaftn!
I hoff, es hat gefallen!
Bevors dann gehngand, bitte ned vogessn:
Zeascht noch zu bezahlen!
Ja, bei uns is no da Kunde Kine,
hauptsach sie hom Gaejd,
fia Zasta mochma oissen megle,
wos gibt aaf dera Waejd!