Opus 118/ 1978
Fraale mecht ma frei sei,
so frei wias hoid grod geht!
Da hamma oizamm einig,
vo saejbst sich des voschteht.
Frei sei vo Kettn
des ja sowieso,
doch mancha war aa frei gean,
vo Pflicht und vom Büro.
So frei grod wia a Vogl,
dea fluigt am Himme om,
doch aa dea muaß manchma landn,
bei uns herunt am Bon.
Do hamma scho beim Hunga,
beim Tringa und beim Schlof,
und Kinda mecht ma aa gean
und wenns rengt ebbs übam Kopf.
Und des schmeckt ois nach Oawat,
nach Pflichtn und nach Schwitz,
wea moint des gaabs zua Gaude
dea mocht sicha an Witz.